Мұндай оқыту форматы алғаш рет іске асырылды: сабақтар тікелей жұмыс істеп тұрған мекемелерде өтті. Бағдарлама аясында магистранттар Ақмола облысының Аршалы кентінде орналасқан Астана қаласы бойынша ҚАЖД № 2 мекемесіне, сондай-ақ елорданың тергеу изоляторына барды.

Көшпелі дәрісті Жоғары Сот Кеңесінің мүшесі, заң ғылымдарының докторы, профессор Айдархан Байдекович Скаков өткізді.

Сапар барысында магистранттар мекеме әкімшілігінің сүйемелдеуімен барынша қауіпсіздік деңгейіндегі мекеменің қызметімен, сотталғандарды ұстау жағдайларымен және ішкі тәртіп талаптарымен танысты. Қылмыстық және қылмыстық-атқару заңнамасын қолдану тәжірибесіне, сондай-ақ сотталғандардың құқықтарын сақтау мәселелеріне ерекше назар аударылды.

Магистранттарға сотталғандар еңбек қызметімен айналысатын өндірістік аймақтар – атап айтқанда, тігін және жиһаз өндірісінде, сондай-ақ басқа да бағыттарда көрсетілді.

Тәжірибеге бағытталған тәсіл болашақ судьяларға теориялық білімді тереңдетіп қана қоймай, сонымен қатар жазаны орындаудың нақты шарттары туралы түсінік алуға мүмкіндік береді, бұл неғұрлым салмақты, негізделген және әділ сот шешімдерін қабылдауға ықпал етеді.