Қазақстан Республикасы Жоғары Сот Кеңесінің жанындағы Сот төрелігі академиясы мемлекеттік білім беру тапсырысы шеңберінде, сондай-ақ білім алушының өз қаражаты есебінен «7M042-Құқық» бағыты: «7М04201 – Сот және сот төрелігі» (ғылыми-педагогикалық магистратура); «7М04202 – Сот және сот төрелігі» (бейінді магистратура) білім беру бағдарламалары бойынша магистратураға оқуға қабылдауды жүргізеді.

Магистратураның мақсаты – сот төрелігін жүзеге асыруды тиімді қамтамасыз етуге, сондай-ақ құқық саласында ғылыми-зерттеу және ғылыми-педагогикалық қызметті жүзеге асыруға қабілетті сот жүйесі үшін жоғары білікті, кәсіби және бәсекеге қабілетті кадрларды даярлау.

Оқу нысаны – күндізгі

Оқу мерзімі – 1 жыл (бейінді магистратура)

2 жыл (ғылыми-педагогикалық магистратура)

Құжаттарды қабылдау 1 маусым мен 29 шілде аралығындағы жұмыс күндері жүзеге асырылады.

Оқуға түсу емтихандары тамыз айының 5 мен 22 күндері аралығында өткізіледі, оқуға қабылдау 25 тамызға (қоса алғанда) дейін жүзеге асырылады.

Ақылы негізде оқу құны бір жылға 3 814 000 теңгені құрайды.

Төлемді әр семестр басталғанға дейін тең үлестермен, сондай-ақ қабылдау туралы бұйрық шыққан күннен бастап 5 жұмыс күні ішінде бір мезгілде толық көлемде жүргізуге болады.

ТҮСУ ЕМТИХАНДАРЫНЫҢ 1 КЕЗЕҢІН (КЕШЕНДІ ТЕСТІЛЕУ) ӨТКІЗУ ШАРТТАРЫ.

Қазақстан Республикасы Ғылым және жоғары білім министрлігінің «Ұлттық тестілеу орталығы» республикалық мемлекеттік қазыналық кәсіпорны (бұдан әрі – Кәсіпорын) Қазақстан Республикасы Жоғары Сот Кеңесінің жанындағы Сот төрелігі академиясына магистратураға бейіндік және ғылыми-педагогикалық бағыттағы түсуші үміткерлерге «М078-Құқық» білім беру бағдарламасының бағыты бойынша кешенді тестілеуге (бұдан әрі – КТ) өтініштерді қабылдау 2025 жылғы 1 маусым мен 29 шілде аралығында және КТ-ны 2-7 тамыз аралығында өткізуді жоспарланғанын хабарлайды.

КТ-ға өтініштерді қабылдау Кәсіпорының ақпараттық жүйесі арқылы жүзеге асырылады (төменде қазақ және орыс тілдеріндегі нұсқаулық берілген).

Тестілеуге қатысу құны 14 693 теңгені құрайтынын атап өтеміз.