Сот төрелігі академиясы ғылыми қызмет субъектісі ретінде аккредиттелді
2025 жылғы 10 сәуірде маңызды институционалдық қадамға қол жеткізілді және стратегиялық міндеттердің бірі орындалды: Қазақстан Республикасы Ғылым және жоғары білім министрлігінің Ғылым комитеті Қазақстан Республикасының Жоғары Сот Кеңесі жанындағы Сот төрелігі академиясын ғылыми және (немесе) ғылыми-техникалық қызмет субъектісі ретінде аккредиттеу туралы куәлік берді.
Бұл куәлік Академия құрылғаннан бері алғаш рет алынып отыр. Аккредиттеу Академияның ғылыми қызметі үшін жаңа мүмкіндіктер ашады және мемлекеттік бюджеттен, халықаралық ұйымдар мен қорлардан, бизнес, үкіметтік емес қорлар мен ұйымдардан қаржыландырылатын ғылыми, ғылыми-техникалык жобалар мен бағдарламалар байқауларына қатысуға мүмкіндік береді. Аккредиттеу Академияның ғылыми және білім беру бағыттарында дамуына ықпал етеді, сонымен қатар мекеменің ұлттық және халықаралық деңгейдегі ғылыми және білім беру ортасындағы беделін арттырады.
Аккредиттеу туралы куәлікті алу жөніндегі жұмыстар кешені Қазақстан Республикасы Жоғары Сот Кеңесі Төрағасының 2025 жылғы 11 ақпандағы № 6 өкімімен бекітілген Сот төрелігі академиясын дамытудың 2025-2027 жылдарға арналған тұжырымдамасының 3.2-тармағын орындау аясында жүргізілді.
