Ташкентте сот білімі мәселелері бойынша халықаралық форум өтті
Ташкентте сот білімі мәселелері бойынша халықаралық форум өтті
Ташкент қаласында Өзбекстан Республикасы Сот төрелігі академиясы ұйымдастырған «Түркі мемлекеттеріндегі сот-құқықтық білім беру және сот төрелігі: цифрлық трансформация және озық тәжірибені интеграциялау» атты халықаралық форум өтті.
Іс-шараға Әзербайжан, Қазақстан, Қырғызстан, Түркия және Өзбекстанның бейінді білім беру және ғылыми мекемелерінің, мемлекеттік органдары мен халықаралық ұйымдарының өкілдері қатысты.
Форумның негізгі тақырыптары судьяларды даярлау мен біліктілігін арттырудың заманауи тәсілдерін дамыту, білім беру үдерістеріне цифрлық технологиялар мен жасанды интеллектті енгізу, электрондық сот төрелігі тетіктерін жетілдіру, сондай-ақ сот-құқықтық білім беру саласындағы халықаралық ынтымақтастықты кеңейту болды.
Форумға қатысушылар озық білім беру практикаларын интеграциялау перспективаларын талқылады, сот реформаларын іске асыру тәжірибесімен алмасты және цифрлық дәуір жағдайында құқықтық жүйелерді трансформациялауға байланысты заманауи сын-қатерлерді қарастырды.
Қазақстан тарапынан форумға Жоғары Сот Кеңесінің мүшесі Қасаболатов К.Е., Жоғары Сот Кеңесінің жанындағы Сот төрелігі академиясының ректоры Мусин К.К., сондай-ақ Академияның ақпараттық технологиялар қызметінің басшысы Шоменов А.М. қатысты.
Кеңес атынан алғы сөз сөйлеген Кәкен Ермұхаметұлы Қасаболатов түркі мемлекеттері арасындағы сот-құқықтық білім беру және судья кадрларын даярлау саласындағы ынтымақтастықты нығайтудың маңыздылығын атап өтті.
Өз кезегінде Қанат Қалқаманұлы Мусин Академияның Жоғары Сот Кеңесінің қарамағына өткеннен кейінгі трансформация нәтижелерін таныстырып, судьялардың біліктілігін арттыру жүйесіне заманауи білім беру тәсілдерінің енгізілуі мен сот жүйесі үшін кадрлар даярлау бағытындағы жұмыстарға тоқталды.
Форум қорытындысы бойынша қатысушылар кәсіби ынтымақтастықты одан әрі дамытуға, бірлескен білім беру бастамаларын жүзеге асыруға және түркі мемлекеттерінің сот және білім беру ұйымдары арасындағы тәжірибе алмасуды жалғастыруға мүдделілік білдірді.
Түркі сот-құқықтық даярлау желісі аясындағы серіктестікті дамыту Сот төрелігі академиясының халықаралық ынтымақтастықтағы басым бағыттарының бірі болып табылады және Жоғары Сот Кеңесінің Төрағасы Дмитрий Михайлович Малаховтың қолдауымен жүзеге асырылуда.
